صديق زوجي

امبارح لقيت جوزي راجع من الشغل ومعاه ألبوم الصور بتاع الفرح بتاعنا فسألته انت كنت اخدت الألبوم ليه ؟
قال لي كنت بفرجه لواحد صحبي
رديت وانا زعلانة  وقولت له ان صورنا دي بتبقى خاصة بينا وبالمقربين من العيلة فقط مش لأي حد يشوفها، وانت عارف إني لابحط صورتي على فيس ولا واتس ولا بفرج صوري لحد

  رد وقال لى وده مش حد غريب دا صديق عمري ومتربي معايا وعشرة عمر، وبعدين فيها إيه ما كل الناس بتفرج بعضيها على صور أفرحهم، يابنتي دي نصف البنات سايبين صورهم عرض في الكوفيرات والأستديوهات واللي رايح واللي بيتفرج عليهم في الشوارع وانا معملتش كدا فامتكبريش الموضوع وأهدي

_أتضايقت وحاولت اكبر دماغي وعديت الموضوع وقولت في نفسي خلاص اللي حصل حصل، يابنتي ماتكبريش الموضوع
وفي نفس اليوم بالليل  تليفون جوزي رن كتير وهو في الحمام قومت وروحت  ناديت عليه وقولت له فيه رقم بيتصل بيك كتير
قال لى مين ؟
قولت له واحد اسمه أحمد رن عليك  حوالي ٦مرات لو حابب اجيبلك الفوطة تنشف إيدك وتكلمه؟
رد وقال لي لأ ردي عليه وقولي له 5دقايق بالظبط هيخلص الحمام بتاعه  ويكلمك

 وبالفعل رديت على صديقه وقولت له هاني هيخلص الشاور بتاعه وهيكلمك
قال لي خلاص على مهله بس اول ما يخلص خليه يكلمني ضروري، قولت له حاضر.. ولسه هقفل السماعة لاقيته بيقول لي  هو انتي العروسة الجديدة ؟

قولت له أيوه، رد وقال لى خلى بالك منه أصل دا صديق عمري، قولت له حاضر عينيا وانتهت المكالمة على كدا

فات يومين ولاقيت التليفون الأرضي بيدى جرس رديت على التليفون وبقول مين?

قال أنا أحمد زميل هاني إيه انتي لحقتي تنسي صوتي عملت نفسي ماسمعتش الكلمة وقولت له هاني طلع من الشغل على ولدته يسلم عليها ممكن تكلمه على الموبايل