رواية تغيرت به بقلم الكاتبة رنا ماهر
ضربه الظابط على قفاه بالقلم
* هو فرح خالتك يا حبيبي يا عساكر خدوا الراجل اللي بيستظرف ده على البوكس واحجزوا على عربيته
اخدوا أسر على البوكس ومشيوا
وقفت مذهولة من اللي حصل قدامي ده !
ببص على الدكتور سيف لقيته غرقان في الضحك
= شوفتي الظابط لما قاله هو فرح خالتك يا حبيبي ولا لما ضربه قلم تحفة على قفاه … اه اه اه يا بطني مش قادر هفطس خلاااص
= انا اقولك، لما كنت بدور عليكي لمحت عربية شكلها حلو على الرصيف عرفت انها عربيته هو والغبي ناسي مفاتيح العربية جواها استغليت انشغاله من انه يلاقيكي شغلتها واخدت لفة على الكوبري الجديد الصراحة شكلها جميل وسريعة ولما خلصت لعب بيها ركنتها في نص الطريق السريع وسيبت الطريق يقلب بسببه عربيته وبعد كده اتصلت على البوليس قدامك
لقيته بيضحك من قلبه ف تلقائيا اضحكت معاه
– طلعت مش سهل اوي يا دكتور
= ما انا لو مش سهل مكنش حد فيكم في الجامعة هيخاف مني
– فعلا
= طيب يلا نمشي
– ماشي
مشينا رجعنا البيت
فتح درج جوه الدولاب كان الدرج مليان تليفونات
– هي التليفونات دي كلها بتاعتك ؟
= اه بتاعتي
– بس ليه ده كله ؟
= لا متحطيش في دماغك اني غني وهوبا هاي وكده والله جايبهم قسط ولسه دافع قسطهم من اسبوع
= تليفوني اللي كسرته امبارح ده كان رابع تليفون اكسره
– ليه كده ؟
= عشان الناس مش بيفتكروا يعصبوني غير في المكالمات ف بينتهي الامر اني اضرب التليفون على الارض
– اها فهمت
= اخيرا لقيتك
اخد تليفون ولسه هيخرج ف بص ناحية الصندوق البنفسجي اللي تحت سريره
قولت في سري
– يا ماماااا ده شكله عرف اني فتحته !
= هو انتي فتحتي الصندوق ده ؟
– صندوق ايه ؟
